Benthyciadau Trefnu a Thaliadau Cyllidebu Ymlaen Llaw

Mae Benthyciad Trefnu yn eich helpu i dalu am rywbeth hanfodol neu annisgwyl os ydych ar incwm isel. Gellir ei ddefnyddio ar gyfer amrywiaeth eang o bethau, gan gynnwys:

• dodrefn neu offer tŷ
• dillad neu esgidiau
• rhent ymlaen llaw neu dreuliau symud ar gyfer cartref newydd
• treuliau teithio
• pethau i’ch helpu i chwilio am waith neu i ddechrau gweithio
• gwella, cynnal a chadw neu ddiogelu eich cartref
• costau mamolaeth neu gostau angladd.

Os ydych yn disgwyl eich plentyn cyntaf neu’n disgwyl mwy nag un babi a bod gennych blant eisoes, efallai y gallwch hawlio grant mamolaeth £500 gan SureStart yn hytrach. Nid oes rhaid i chi dalu hwn yn ôl.

Os ydych yn cael rhai budd-daliadau penodol a bod rhaid i chi dalu costau angladd perthynas neu ffrind agos, efallai y gallwch wneud cais am Daliad Angladd.

Gallwch wneud cais am Fenthyciadau Trefnu os ydych yn cael un o’r budd-daliadau hyn:

• Credyd Pensiwn
• Cymhorthdal Incwm
• Lwfans Ceisio Gwaith yn Seiliedig ar Incwm
• Lwfans Cyflogaeth a Chymorth yn gysylltiedig ag incwm.

Mae rhaid eich bod wedi bod yn hawlio am o leiaf 26 wythnos, naill ai’n olynol neu â thoriad o ddim mwy na 28 diwrnod.

Yr isafswm y gallwch wneud cais amdano yw £100, ond mae uchafsymiau yn seiliedig ar amgylchiadau’ch cartref:

• £384 os ydych yn sengl
• £464 os ydych yn rhan o gwpl
• £812 os oes gennych blant.

Mae rhai pethau’n effeithio ar swm y benthyciad yr ymgeisiwch amdano, fel:

• benthyciadau presennol o’r Gronfa Gymdeithasol
• cynilion dros £1,000 (neu £2,000 os ydych yn 63 neu’n hŷn).

Gallwch hawlio ar-lein ar wefan GOV.UK. Nid yw’r opsiwn hwn ar gael yng Ngogledd Iwerddon.

Gallwch hefyd lawrlwytho, argraffu a chwblhau Ffurflen SF500 oddi ar GOV.UK

Neu gofynnwch am y ffurflen yn eich Canolfan Byd Gwaith leol (neu’ch Jobs and Benefits Office yng Ngogledd Iwerddon).

Mae’r ad-daliadau ar y benthyciad yn ddi-log ac yn cael eu cyfrifo pan gytunir ar eich benthyciad.

Yn ddibynnol ar y swm a fenthycir gennych, fel arfer mae rhaid i chi ad-dalu’r swm cyn pen dwy flynedd.

Fel arfer, bydd ad-daliadau yn cael eu tynnu’n awtomatig o’ch budd-daliadau.

Os daw eich budd-daliadau i ben wrth i chi dalu’r benthyciad yn ôl, bydd angen i chi gytuno ar ffordd arall o dalu’r arian yn ôl.

Os oes gennych fenthyciad ond na allwch fforddio’r ad-daliadau a gytunwyd bellach, rhowch wybod i’r swyddfa a dalodd y benthyciad i chi er mwyn cyfrifo cynllun ad-dalu arall. Mae’n bwysig i chi beidio â mynd i ddyled wrth geisio clirio’r benthyciad.

Os ydych yn hawlio Credyd Cynhwysol dylech gwneud cais am Daliad Cyllidebu Ymlaen Llaw yn hytrach na Benthyciad Trefnu. Mae hyn yn cyfateb i Fenthyciad Trefnu ar gyfer pobl sy'n hawlio Credyd Cynhwysol.

Er mwyn cael Taliad Cyllidebu Ymlaen Llaw mae rhaid:

• Eich bod wedi bod yn cael Credyd Cynhwysol ers chwe mis o leiaf – oni bai bod angen yr arian arnoch i gael swydd neu gadw swydd bresennol.
• Eich bod wedi ennill llai na £2,600 os ydych yn sengl (£3,600 os ydych yn gwpl) yn y chwe mis diwethaf.
• I chi beidio â bod yn ad-dalu Taliad Cyllidebu Ymlaen Llaw arall.

Fel arfer bydd rhaid i chi ddechrau talu’ch Taliad Cyllidebu Ymlaen Llaw yn ôl allan o’ch taliad Credyd Cynhwysol nesaf a’i ad-dalu o fewn 12 mis.

Gofynnwch i’ch anogwr gwaith yn eich Canolfan Byd Gwaith leol am sut i ymgeisio am Daliad Cyllidebu Ymlaen Llaw.

Yr isafswm y gallwch wneud cais amdano yw £100, ond mae yna uchafsymiau yn seiliedig ar amgylchiadau’ch cartref:

• £384 os ydych yn sengl
• £464 os ydych yn rhan o gwpl
• £812 os oes gennych blant.

Gall y llywodraethau datganoledig yng Nghymru, yr Alban, a Gogledd Iwerddon, ac awdurdodau lleol yn Lloegr roi cymorth a chefnogaeth mewn argyfwng.

• Os ydych yn byw yng Nghymru, dysgwch am y Gronfa Gymorth DdewisolYn agor mewn ffenestr newydd ar wefan Llywodraeth Cymru.
• Os ydych yn byw yn yr Alban, dysgwch am y Gronfa Les AlbanaiddYn agor mewn ffenestr newydd ar wefan Llywodraeth yr Alban.
• Os ydych yn byw yng Ngogledd Iwerddon, dysgwch am Gefnogaeth DdewisolYn agor mewn ffenestr newydd ar wefan nidirect.
• Os ydych yn byw yn Lloegr, cysylltwch â’ch cyngor lleol i ddod o hyd i’ch cynllun cymorth lles lleol.

Efallai gallwch wneud cais am daliad budd-dal tymor byr ymlaen llaw os oes angen arian arnoch wrth i chi ddisgwyl am eich taliad cyntaf o’r budd-daliadau hyn:

• Lwfans Gofalwr
• Credyd Pensiwn
• Pensiwn y Wladwriaeth
• Lwfans Cyflogaeth a Chymorth
• Lwfans Ceisio Gwaith.

Gofynnwch i’ch Canolfan Byd Gwaith (neu Jobs and Benefits Offices yng Ngogledd Iwerddon) am daliad budd-dal tymor byr ymlaen llaw.

Os ydych yn disgwyl am eich taliad Credyd Cynhwysol cyntaf, gallwch ofyn am Daliad Ymlaen Llaw Credyd Cynhwysol.