Beth bynnag bo eich incwm neu sefyllfa ariannol, mae’n gwneud synnwyr i gadw rheolaeth ar sut rydych yn gwario’ch arian parod. Mae’r dull pot jam yn golygu rhannu’ch arian i botiau gwahanol ar gyfer treuliau gwahanol. Mae’n ffordd wych o sicrhau y telir eich biliau a bod eich arian yn mynd yn union ble rydych eisiau iddo fynd.
Cyn i chi gychwyn – lluniwch gyllideb
Er mwyn i’r dull pot jam weithio, yn gyntaf mae angen ichi gael darlun clir o faint o arian sydd gennych yn dod i mewn a ble mae’n mynd bob mis neu bob wythnos.
Cynlluniwr Cyllideb
I’ch helpu i reoli eich arian, defnyddiwch ein Cynlluniwr Cyllideb hawdd i’w ddefnyddio, rhad ac am ddim.
Dewiswch eich blaenoriaethau gwario
Y cam nesaf yw edrych yn ofalus ar bopeth rydych yn gwario arian arno – a phenderfynu pa rai ohonynt sy’n ‘hanfodion a pha rai sy’n ‘ddymuniadau’:
- Dechreuwch drwy restru’ch anghenion – y rhain yw eich rhent neu forgais, a biliau hanfodol eraill fel nwy a thrydan. Mae hyn hefyd yn cynnwys cadw i fyny gydag unrhyw ad-daliadau sydd gennych ar gardiau credyd neu fenthyciadau.
- Ar ôl trefnu’r pethau hanfodol, edrychwch ar eich dymuniadau. Gallai hyn olygu ychwanegion, fel mynd allan a hobïau. Neu gallent fod yn nodau hirdymor fel cynilo am wyliau.
- Os na allwch fforddio’ch holl ddymuniadau, bydd rhaid I chi benderfynu pa rai sy’n bwysicaf ichi neu ystyried ffyrdd o dorri costau.
Dychmygwch jwg wedi’i lenwi â dŵr sy’n cynrychioli’r arian sydd gennych yn dod i mewn bob mis. Nawr dychmygwch botiau jam gwag – un ar gyfer pob peth mae angen i chi dalu amdano bob mis. Yna penderfynwch faint o arian i’w roi ym mhob pot.
Defnyddio cynhwyswyr gwirioneddol fel potiau jam neu amlenni
Pan fydd gennych ddarlun clir o’ch anghenion gwario bob mis, mae’n amser penderfynu pa fath o gynhwyswr yr hoffech ei ddefnyddio ar gyfer eich cyllidebu.
Naill ai gallwch ddefnyddio cynhwyswyr gwirioneddol fel potiau jam neu amlenni, neu sefydlu cyfrifon banc gwahanol ar gyfer pob math o wario.
Wrth ddefnyddio cynhwyswyr go iawn i gyllidebu, rydych yn cymryd arian parod o’r pot penodedig i dalu pob bil wrth iddo ddod i mewn. Hefyd rydych yn gwneud yr un peth cyn mynd i siopa.
A oes gennych unrhyw arian parod yn weddill yn y potiau ar diwedd yr wythnos neu’r mis? Ceisiwch fynd I’r arfer o’i roi tuag at gronfa cynilion argyfwng
Manteision
-
Mae’r dull hwn yn gweithio’n arbennig o dda os yw’ch arian yn dod i mewn unwaith yr wythnos ond mae’ch biliau’n fisol. Mae rhoi arian mewn pot bob wythnos yn ei wneud yn haws i dalu’r biliau mwy ar ddiwedd y mis.
-
Mae cael arian parod mewn cynhwyswyr yn eich atgoffa faint rydych yn ei wario yn ystod y mis – ac felly gall eich helpu i wario llai o arian.
Anfanteision
-
Nid yw talu am bopeth gydag arian parod yn gyfleus neu hyd yn oed yn bosibl bob tro.
-
Bydd angen i chi fod yn arbennig o ofalus ynghylch diogeledd os cadwch eich holl gyllideb wythnosol yn y tŷ.
-
Byddwch yn colli allan ar fân fanteision talu biliau trwy Ddebyd Uniongyrchol, fel tariffau rhatach a’ch biliau’n cael eu talu’n awtomatig.
Defnyddio gwahanol gyfrifon banc ar gyfer gwahanol fathau o wariant
Yn lle defnyddio cynhwyswyr, mae’n well gan rai pobl sefydlu gwahanol gyfrifon banc ar gyfer gwahanol fathau o wariant misol.
I’ch helpu i gyfrifo faint o gyfrifon i’w hagor, casglwch eich hanfodion a dymuniadau mewn ychydig o brif feysydd yn unig - er enghraifft:
- rhent neu forgais
- cerbyd a thrafnidiaeth
- biliau
- cynilion argyfwng
- dathliadau a/neu wyliau.
Ar ôl ichi agor cyfrif ar wahân ar gyfer pob maes o wariant, mae angen i chi gyfarwyddo’ch banc i:
- sefydlu archebion sefydlog sy’n trosglwyddo arian yn awtomatig o’ch prif gyfrif i’r cyfrifon ychwanegol hyn un neu ddau ddiwrnod ar ôl ichi gael eich talu
- sefydlu Debyd Uniongyrchol ar gyfer pob un o’ch biliau.
Darganfyddwch sut i sefydlu Debydau Uniongyrchol ac archebion sefydlog
Manteision
-
Ar ôl i’ch archebion sefydlog gael eu talu, gallwch wario o’ch prif gyfrif heb y risg na fydd digon o arian ar ôl ar gyfer biliau misol pwysig.
-
Mae’n ffordd wych o ledaenu cost yr eitemau unwaith-y-flwyddyn fel gwyliau, Nadolig a threth car.
Anfanteision
-
Bydd angen i chi reoli’ch holl gyfrifon yn ofalus er mwyn sicrhau eich bod yn aros mewn credyd ac yn peidio â thynnu ffioedd a thaliadau.
-
Gall agor nifer o gyfrifon effeithio ar eich sgôr credyd.
Dewis y math cywir o gyfrif
Ar gyfer eich prif gyfrif a chyfrifon biliau, edrychwch am gyfrif cyfredol neu sylfaenol sy’n caniatáu ichi sefydlu Debydau Uniongyrchol ac archebion sefydlog.
Hefyd gwiriwch nad yw’r banc yn gosod isafswm o arian mae’n rhaid ichi ei dalu i mewn i’r cyfrif bob mis.
Mae gwefannau cymharu yn lle da i gychwyn ar gyfer unrhyw un sy’n ceisio dod o hyd i cyfrifon cyfredol. Byddwch yn ymwybodol ni fydd pob gwefan gymharu yn rhoi’r un canlyniadau i chi.
Dyma rai gwefannau sy’n cymharu cyfrifon cyfredol:
- Money Saving Expert
- Which?
- Os ydych yn byw yng Ngogledd Iwerddon, The Consumer Council
Mae hefyd yn bwysig gwneud tipyn o waith ymchwil i mewn i’r math o gynnyrch neu nodweddion a ddymunwch cyn prynu neu newid darparwr.
Darganfyddwch fwy yn ein canllaw ar wefannau cymharu
Cymharu cyfrifon cyfredol
Gweld yr holl ffioedd a thaliadau sy’n berthnasol i gyfrifon banc – gan ddangos popeth o ffioedd gorddrafft i gostau codi arian tramor.
Gwiriwch a yw eich cyfrif yn cynnig nodweddion cronfeydd cynilo 'pot jam'
Mae rhai banciau yn cynnig nodweddion sy'n eich caniatáu i sefydlu gwahanol gronfeydd at ddibenion penodol. Yn dibynnu ar y banc a ddewiswch, gall y nodweddion ei gwneud hi'n gyflym ac yn syml i gadw arian mewn cronfeydd ar wahân a symud arian rhyngddynt.
Meddyliwch am y cronfeydd hyn yn debyg iawn i'ch cadw-mi-gei digidol - man yn eich cyfrif lle gallwch wahanu rhywfaint o'r arian oddi wrth eich cyfrif cyfredol gan ei gadw ar wahân i'ch gwariant. Mae rhai banciau hyd yn oed yn eich caniatáu i gloi'ch cronfeydd rhag ofn y cewch eich temtio i’w defnyddio.
Mae'r rhan fwyaf o'r banciau digidol - yn unig newydd yn cynnig nodweddion cronfeydd cynilo ac mae rhai banciau traddodiadol yn cynnig y gallu i greu cyfrifon ar wahân. Gofynnwch i'ch banc a yw'n cynnig y nodweddion hyn.
Mae MoneySavingExpert yn cynnig trosolwg da o'r prif fanciau digidolYn agor mewn ffenestr newydd a pha nodweddion a manteision maent yn eu cynnig.
Cyfrifon pot jam
Mae cyfrifon pot jam wedi’u cynllunio i adael i chi rannu’ch arian mewn cronfeydd gwahanol o fewn un cyfrif a ddarperir fel arfer gan undeb credyd.
Fel arfer mae cyfrifon pot jam yn gweithio fel hyn:
- Pan fydd arian yn dod i mewn i’ch cyfrif, rhoddir swm cytun heibio ar gyfer biliau hanfodol.
- Yna telir y biliau hyn drwy Ddebyd Uniongyrchol neu archeb sefydlog.
- Mae’r arian dros ben ar gael i chi ei ddefnyddio, naill ai ar gerdyn rhagdaledig neu gallwch ei godi o beiriant arian parod.
Manteision
-
Mae’n rhaid i chi reoli un cyfrif banc yn unig.
-
Fel arfer mae darparwr y cyfrif yn rheoli’ch holl Ddebydau Uniongyrchol ac archebion sefydlog ar eich rhan.
-
Ithiau mae’r cyfrifon hyn yn dod gyda chyngor ar gyllidebu.
Anfanteision
-
Codir ffi weinyddol o rhwng £5 a £15 arnoch bob mis. Fodd bynnag, mae rhai landlordiaid tai cymdeithasol a chynghorau wedi bod yn gweithio gydag undebau credyd i gynnig cyfrifon cyfredol i denantiaid gyda ffioedd is. Os yw’ch landlord yn un ohonynt, efallai y byddant yn talu’r ffi weinyddol ar eich rhan.
-
Gall fod yn anodd dod o hyd i gyfrif pot jam penodol.
Ymunwch â’n grŵp Facebook
Ymunwch â’n grŵp Facebook Budgeting and Saving preifat ar gyfer awgrymiadau gan gymuned o gynilwyr.
Agor cyfrif pot jam
Nid yw cyfrifon pot jam ar gael yn eang eto, ond mae cryn nifer o undebau credyd yn eu cynnig. I ddod o hyd i’ch undeb credyd lleol, ewch i’r gwefannau hyn:
- Yng Nghymru, Lloegr neu’r Alban – Dewch o hyd i'ch Undeb GredydYn agor mewn ffenestr newydd
- Yng Ngogledd Iwerddon – Irish Federation of Credit Unions or Ulster Federation of Credit Unions
Hefyd gallwch chwilio ar-lein am ‘gyfrifon pot jam’ i weld ble gallwch gael un ac i gymharu ffioedd a gwasanaethau gwahanol ddarparwyr.
