Darganfyddwch fwy am sut mae Gorchymyn Gweinyddu yn gweithio ac ar gyfer pa ddyledion allwch chi ei ddefnyddio. Yna siaradwch gyda chynghorydd dyledion am p’un ai dyma’r ffordd orau i glirio eich dyledion.
Sut mae Gorchymyn Gweinyddu yn gweithio
Mae Gorchymyn Gweinyddu yn gytundeb ffurfiol, rhwymol gyfreithiol rhyngoch chi a'ch credydwyr i ad-dalu'ch dyledion dros gyfnod o amser.
Gallwch wneud cais i’r Llys Sirol am Orchymyn Gweinyddu os:
- mae gennych un Dyfarniad Llys Sirol neu Un Dyfarniad Uchel Lys yn eich herbyn o leiaf
- rydych yn dymuno atal y bobl y mae arnoch arian iddynt (eich credydwyr) rhag gweithredu ymhellach yn eich erbyn.
Bydd barnwr yn penderfynu pa un ai i gymeradwyo Gorchymyn Gweinyddu neu beidio. Yn ddibynnol ar y sefyllfa, efallai y bydd y barnwr yn gofyn i chi fynychu gwrandawiad llys
Os cytunir ar y Gorchymyn, bydd eich holl ddyledion yn cael eu trin gyda’i gilydd.
Cytunwch i wneud taliadau misol rheolaidd i’r llys am y swm llawn sy’n ddyledus i’ch holl gredydwyr.
Yna mae’r llys yn rhannu’r arian ymysg y credydwyr hynny.
Gwaherddir eich credydwyr rhag cysylltu â chi heb ganiatâd y llys.
Bydd y llys yn cynnwys ffioedd ar gyfer pob ad-daliad, ond ni all hyn fod yn fwy na 10% o'r cyfanswm sy'n ddyledus gennych.
A gaf i ymgeisio am Orchymyn Gweinyddu?
Efallai y gallech wneud cais i’r Llys Sirol am Orchymyn Gweinyddu:
- os oes gennych chi ddwy ddyled o leiaf
- os oes arnoch chi lai na chyfanswm o £5,000
- mae gennych un Dyfarniad Llys Sirol neu Un Dyfarniad Uchel Lys yn eich herbyn o leiaf
- os allwch chi fforddio gwneud taliadau rheolaidd tuag at eich dyledion – gall hyn fod cyn lleied ag £1 fesul dyled.
Ydy eich incwm cartref yn cael ei wasgu?
Os ydych chi’n wynebu costau byw uwch, ond heb fawr o arian os o gwbl yn dod i mewn, darganfyddwch ffynonellau incwm ychwanegol a chymorth sydd ar gael i’ch helpu i reoli biliau cartref ac arbed arian yn ein canllaw Byw ar incwm gwasgedig
Beth yw Gorchymyn Cyfansawdd?
Os yw’n annhebygol y byddwch yn gallu talu’r ddyled yn llawn dros gyfnod rhesymol, gall y llys gytuno i warantu Gorchymyn Cyfansawdd.
Mae’r Gorchymyn hwn yn caniatáu i chi dalu rhan o’r hyn sy’n ddyledus gennych yn ôl, ac fe gaiff y gweddill ei ddileu.
Ceisiwch gyngor dyledion rhad ac am ddim
Angen rhywun i siarad â nhw am eich cyllid?
Os ydych wedi methu mwy nag un taliad bil, gallech siarad ag arbenigwr heddiw, ar-lein neu dros y ffôn, a fydd yn gallu eich helpu i ddechrau delio a’ch problemau ariannol.
Darganfyddwch gyngor cyfrinachol am ddim nawr gan ddefnyddio ein Teclyn Canfyddwr cyngor dyledion
Mae’n well trafod pethau gyda arbenigwr dyledion profiadol cyn i chi benderfynu ymgeisio am Orchymyn Gweinyddu neu Gyfansawdd.
Mae hyn oherwydd bod y datrysiad dyledion sydd orau i chi yn ddibynnol ar eich amgylchiadau personol.
Gall arbenigwr dyled eich helpu i wneud y penderfyniadau cywir felly bydd y rhan fwyaf o'ch arian yn mynd i dalu'ch dyledion.
Mae hyn yn golygu y gallech fod yn rhydd o ddyledion yn gynt nag yr ystyrioch.
Bydd arbenigwr dyledion:
- yn trin popeth a ddywedwch yn gyfrinachol
- byth yn eich barnu na’n gwneud i chi deimlo’n wael am eich sefyllfa
- yn awgrymu ffyrdd i ddelio â dyledion nad oeddech chi’n ymwybodol ohonynt efallai
- yn gwirio eich bod wedi ymgeisio am yr holl fudd-daliadau a hawliau sydd ar gael i chi
- yn gwneud yn siŵr eich bod chi'n gyffyrddus â'ch penderfyniad bob amser
Mae tri chwarter y bobl sy'n cael cyngor ar ddyledion yn teimlo mwy o reolaeth ar eu cyllid wedi hynny.
Gyda rhai gwasanaethau cynghori ar ddyledion, gallwch fynd trwy'r opsiynau a gwneud penderfyniad eich hunan os dyna beth sydd orau gennych.
