Cynilo arian i fynd ar wyliau

Gall cynilo arian fod yn anodd, ond mae’n werth ceisio'i wneud. Mae nifer o bobl yn cael trafferth i gynilo gan nad oes ganddynt arian ychwanegol. Ond mae yna ffyrdd i ddod o hyd i arian ychwanegol ar gyfer cynilion, fel:

• adolygu a newid eich cyflenwr ynni
• sicrhau eich bod yn cael yr holl fudd-daliadau y mae gennych hawl iddynt
• cadw cofnod o’ch incwm a gwariant i reoli eich cyllideb yn well
• lleihau gwariant yn y meysydd rydych yn gwario’r mwyaf.

Mae’n bwysig iawn cyfrifo faint rydych eisiau ei gynilo a faint y gallwch fforddio ei roi o’r neilltu bob mis.

Dyma sut i’w wneud.

Yn gyntaf, lluniwch restr o’r holl eitemau y mae angen i chi dalu amdanynt cyn i chi fynd, fel:

• teithio (hedfan neu gostau tanwydd)
• llety
• llogi car (ac yswiriant car dros ben)
• yswiriant teithio
• arian teithio
• dillad gwyliau a dillad nofio
• eli haul a phethau ymolchi.

Yn ail, meddyliwch am dreuliau dyddiol ar wyliau fel:

• bwyd a diod
• adloniant
• danteithion gwyliau
• Gwibdeithiau.

Adiwch y costau hyn ynghyd a bydd gennych nod cynilo.

Mae’n bosibl y gallwch arbed ychydig ar gostau’r gwyliau hefyd, sy’n golygu y bydd angen i chi gynilo ychydig yn llai o arian.

Dylech drin cynilo’r un ffordd â thalu bil, ac ymrwymo i gynilo swm rheolaidd bob mis neu wythnos. Fel hyn bydd yn llawer yn haws i chi gyllidebu cynilion a gwariant.

Ond byddwch yn realistig – mae’n well ymrwymo i swm bach, ymarferol na cheisio’n rhy galed a rhoi’r gorau iddi.

Os yw’ch incwm yn amrywio o fis i fis neu hyd yn oed o wythnos i wythnos, neilltuwch swm rydych yn gwybod y gallwch gadw ato, waeth pa mor fach y mae’n teimlo. Gallwch bob amser ychwanegu ato yn ddiweddarach. Y nod yw peidio â chyffwrdd yr arian yr ydych wedi’i neilltuo.

• Dechreuwch mewn ffordd syml trwy roi newid mân mewn jar bob wythnos. 
• Os yw hyn yn gweithio, neilltuwch ychydig yn fwy yn rheolaidd.
• Os yw hyn yn anodd, cynilwch yr hyn sy’n bosibl i chi mor rheolaidd ag y gallwch. Mae pob ceiniog yn gwneud gwahaniaeth mawr.
• Ceisiwch gynilo yn gymdeithasol, er enghraifft gyda ffrind, a gwiriwch gyda hwy i weld sut mae’n mynd.
• Gwnewch y cynilo yn weledol trwy olrhain eich cynnydd gyda siart – gallwch roi rhywbeth ar yr oergell neu ar wal eich ystafell wely.
• Defnyddiwch Ddebyd Uniongyrchol neu archeb sefydlog i dynnu swm rheolaidd yn awtomatig o’ch cyflog a’i roi mewn cyfrif cynilo fel na fyddwch byth yn anghofio cynilo.
• Rhowch enw i’ch nod – boed hynny’n daith i’r teulu i’r arfordir yn y DU neu wyliau rhamantus i Rufain, bydd rhoi enw i’ch nod yn eich cymell.

Mae’n bryd dechrau meddwl am le i gadw’ch cynilion.

Mae cyfrifon banc yn ei gwneud yn haws ac yn fwy diogel cynilo’ch arian. Efallai y byddwch yn dechrau gyda jar arian – bydd cynilo £10 yr wythnos yn cronni £520 y flwyddyn i chi. Ond, cofiwch drosglwyddo’ch arian i gyfrif cynilo pan fydd swm taclus wedi’i gronni.

Fel hyn, gallwch ennill ychydig o log ar ei ben.

Bydd eich banc yn caniatáu i chi sefydlu cronfa ar wahân ar gyfer eich nod gwyliau ar-lein. Trefnwch un os gallwch oherwydd bydd yn eich helpu i osod targed ac olrhain eich cynnydd.

Mae gwefannau cymharu yn fan cychwyn da os ydych eisiau dod o hyd i gyfrif cynilo wedi’i deilwra i’ch anghenion.

Ni fydd y gwefannau cymharu i gyd yn rhoi’r un canlyniadau i chi, felly gwnewch yn siŵr eich bod yn defnyddio mwy nag un safle cyn penderfynu.

Mae hefyd yn bwysig gwneud ychydig o ymchwil i’r math o gynnyrch a nodweddion y mae eu hangen arnoch cyn prynu unrhyw beth neu newid cyflenwr.

Pa dreuliau y credwch a allai godi? A yw’r car yn dangos arwyddion o dreulio, a yw’r boeler neu’r peiriant golchi yn hen iawn?

A allech leihau'r tebygrwydd y bydd cost yn codi, trwy gael gwasanaeth neu yswiriant?

A allwch newid rhywbeth yn rhatach yn y sêl yn awr cyn iddo dorri yn llwyr neu a yw rhywun yn cynnig rhywbeth y byddwch ei angen neu sgil y gallwch gael disgownt arno?

Cyfrifwch faint y byddai cronfa arferol wrth gefn ar eich cyfer.

Gall hyn eich helpu i anelu at rywbeth. 

Hyd yn oed pan fyddwch wedi gorffen cynilo am wyliau, peidiwch â rhoi’r gorau iddi – gellir defnyddio’r arian at gronfa wrth gefn, mynd tuag at wyliau newydd, neu’ch helpu i fyw yn gyfforddus yn y dyfodol.