Beth fydd yn digwydd i gyfraniadau pensiwn os byddwch yn mynd yn sâl ac yn methu gweithio

Os ydych yn aelod o gynllun pensiwn cyfraniadau gweithle wedi’u diffinio a bod eich cyflogwr yn parhau i'ch talu pan fyddwch yn sâl, byddant hefyd yn talu eu cyfraniadau i'ch pensiwn.

Byddant yn parhau i ddidynnu'ch cyfraniadau o'ch cyflog, ac yn eu talu i'r cynllun.

Fodd bynnag, os bydd eich cyflog yn lleihau, neu os byddant yn stopio eich talu ar ôl cyfnod penodol o amser, bydd y symiau a delir i'ch pensiwn yn lleihau, neu'n stopio.

Os ydych yn aelod o gynllun pensiwn buddion wedi’u diffinio, byddwch yn parhau i gronni'ch pensiwn tra'ch bod yn cael eich talu.

Ond os bydd eich cyflog yn lleihau, bydd eich pensiwn yn adeiladu ar gyfradd arafach.

Os yw'ch cyflogwr yn rhoi'r gorau i'ch talu, byddwch yn stopio adeiladu'ch pensiwn.

Efallai na fyddwch yn gallu fforddio parhau i dalu cyfraniadau ar yr un gyfradd - p'un a ydych yn gyflogedig neu'n hunangyflogedig - os oes gennych:

• pensiwn personol
• pensiwn personol wedi'i fuddsoddi ei hun, neu
• cynllun pensiwn rhanddeiliaid.

Os byddwch yn lleihau'ch cyfraniadau, bydd eich cronfa pensiwn yn tyfu ar gyfradd arafach.

Felly bydd gennych lai o arian i'w ddefnyddio fel incwm pan fyddwch yn penderfynu dechrau ei dynnu allan.

Mae'n bosibl diogelu rhai neu bob un o'ch cyfraniadau gan hepgor premiwm, os yw'ch darparwr yn cynnig hyn.

Mae hepgor premiwm yn golygu y bydd eich cyfraniadau yn parhau i gael eu talu ar eich rhan os na allwch eu gwneud am amser. Yn aml, bydd hyn os ydych yn dioddef anaf difrifol, salwch neu anabledd. Mae'n debygol y bydd cost ychwanegol i gynnwys yr opsiwn hwn ac fel rheol byddai angen i chi ei ddewis pan sefydlir y pensiwn gyntaf.

Gallech hefyd ddefnyddio polisi amddiffyn incwm.

Mae llawer o gyflogwyr yn cynnwys hyn fel rhan o'u pecyn buddion cyflogaeth, ond gallwch hefyd sefydlu un eich hun.

Gall polisi amddiffyn incwm dalu incwm i chi os nad ydych yn gallu gweithio oherwydd afiechyd. Mae hyn yn caniatáu i chi barhau i wneud cyfraniadau i'ch pensiwn.

Bydd polisïau amddiffyn incwm fel arfer yn rhoi'r gorau i dalu incwm i chi pan gyrhaeddwch oedran Pensiwn y Wladwriaeth.

Os ydych yn sâl iawn neu'n analluog, ac mae’n annhebygol y byddwch yn gallu gweithio eto, efallai y gallwch ddechrau cymryd arian neu incwm o'ch pensiwn yn gynnar. Bydd hyn waeth beth yw eich oedran.

Bydd angen i chi siarad â gweinyddwr eich cynllun neu'ch darparwr pensiwn i weld a yw hyn yn bosibl.

Os oes gennych bensiwn buddion wedi’u diffinio ac yn dechrau cymryd incwm o'ch pensiwn yn gynnar, gallai'r cynllun dalu incwm is i chi na phe byddech wedi parhau i weithio tan eich dyddiad ymddeol disgwyliedig.

Os oes gennych gronfa pensiwn cyfraniadau wedi’u diffinio ac yn dechrau cymryd arian ohono yn gynharach, efallai y bydd angen iddo dalu incwm i chi am fwy o amser. Gallai hyn olygu eich bod yn rhedeg allan o arian yn gynt.

Mewn achosion eithafol, lle mae disgwyl i'ch disgwyliad oes fod yn llai na blwyddyn, gallai rheolau'r cynllun ganiatáu i chi gymryd gwerth cyfan eich pensiwn fel cyfandaliad arian parod di-dreth. Gelwir hyn yn ‘gyfandaliad afiechyd difrifol’

Gallai lefel Pensiwn y Wladwriaeth a gewch pan gyrhaeddwch oedran Pensiwn y Wladwriaeth hefyd gael ei effeithio os nad ydych yn gallu talu cyfraniadau Yswiriant Gwladol (NICs) unrhyw bryd cyn i chi gyrraedd eich oedran Pensiwn y Wladwriaeth ac os nad ydych yn cael credydau NIC.

Os ydych yn cael budd-daliadau'r Wladwriaeth tra'ch bod yn sâl, gwiriwch eich bod hefyd yn cael credydau NIC. Nid yw'n bosibl dechrau cael incwm o Bensiwn y Wladwriaeth tan eich oedran Pensiwn y Wladwriaeth arferol.