Help os ydych yn cael trafferth talu'ch bil dŵr

Os ydych yn cael trafferth talu'ch bil, mae pecynnau cymorth y gall eich cwmni dŵr eu cynnig i chi.

Bydd hyn yn dibynnu ar eich amgylchiadau a gallai gynnwys:

• seibiannau talu neu wyliau talu
• cynlluniau arbennig, fel tariffau cymdeithasol
• addasu eich cynllun talu i ymdopi â gostyngiad yng nghyllid y cartref
• cynnig cyngor ar fudd-daliadau a rheoli dyledion, yn enwedig os nad ydych wedi cael trafferthion ariannol o'r blaen
• atal ceisiadau llys newydd ar filiau heb eu talu a chamau gorfodi yn ystod y cyfyngiadau coronafeirws cyfredol.
• darganfod a ydych yn gymwys i gael grantiau elusennol.

I ddarganfod pa help y gallech ei gael, cysylltwch â'ch cwmni dŵr cyn gynted ag y gallwch - a chyn i chi fethu taliad. Bydd eu manylion cyswllt a mwy o wybodaeth ar eu gwefan ac ar eich bil.

Os ydych yn anabl, yn ofalwr, gyda chyflwr meddygol neu os oes angen cymorth ychwanegol arnoch gan eich cwmni dŵr am unrhyw reswm arall, dylent ei gynnig i chi.

Gallai'r cymorth ychwanegol y byddwch yn ei gael gynnwys derbyn eich bil dŵr mewn fformat print mawr neu Braille, cael rhybudd ymlaen llaw o pryd y bydd eich dŵr yn cael ei ddiffodd dros dro fel y gallwch fod yn barod, neu wneud eich mesurydd yn fwy hygyrch. Gallwch hefyd ofyn i sefydlu cyfrinair i'ch cwmni dŵr ei ddefnyddio pan fyddant yn cysylltu â chi, os ydych chi'n poeni am sgamwyr ffôn, e-bost neu stepen drws. 

Defnyddiwch y dolenni isod i gofrestru ar gyfer Gwasanaethau Blaenoriaeth neu'r Gofrestr Gofal Cwsmeriaid.

• Yng Nghymru a Lloegr gallwch ddod o hyd i ragor o wybodaeth ar OfwatYn agor mewn ffenestr newydd
• yng Ngogledd Iwerddon cewch fwy o wybodaeth ar NI WaterYn agor mewn ffenestr newydd
• ac yn yr Alban mae mwy o help ar Priority Services Register ScotlandYn agor mewn ffenestr newydd

Mae'n bwysig talu – a pheidio ag anwybyddu – eich bil dŵr.

Ni all eich cwmni dŵr ddiffodd eich cyflenwad dŵr, ond byddant yn cymryd camau os byddwch yn methu taliadau.

Nid yw hi byth yn rhy hwyr i gysylltu â'ch cyflenwr a gofyn am gefnogaeth. Os na wnewch unrhyw beth, mae amryw camau y gallai eich cyflenwr eu cymryd:

• Efallai y byddant yn gofyn i chi gysylltu trwy ysgrifennu atoch neu ffonio.
• Byddant yn anfon rhybudd atgoffa atoch, yn eich hysbysu am yr ôl-ddyledion.
• Os anwybyddwch y nodyn atgoffa, byddant yn anfon rhybudd terfynol (fel arfer yn rhoi saith diwrnod i chi dalu).
• Os na all eich cyflenwr gysylltu â chi, byddant yn trosglwyddo'r ddyled i asiantaeth casglu dyledion.
• Efallai y byddant yn ceisio Dyfarniad Llys Sirol (CCJ), sy'n rhoi sawl opsiwn iddynt orfodi ad-daliad o'ch dyled.
• Pan fydd gan eich cyflenwr CCJ, gallant anfon beili neu siryf (asiant gorfodi) i'ch cartref i atafaelu nwyddau sy'n hafal i werth y ddyled, ynghyd â ffioedd sy'n cael eu hychwanegu at eich dyled.
• Nid yw dyledion dŵr yn cael eu rheoleiddio gan y Ddeddf Credyd Defnyddiwr. Mae hyn yn golygu, os ydych yn derbyn CCJ dros £600, gall eich cyflenwr anfon swyddogion gorfodi'r Uchel Lys yn lle beilïaid cyffredin.
• Gall cwmnïau dŵr hefyd wneud cais i’r Adran Gwaith a Phensiynau (DWP) a didynnu taliadau wythnosol o rai o'ch budd-daliadau.
• Os ydych yn gofalu am dri neu fwy o blant, neu os oes rheswm meddygol pam eich bod chi'n defnyddio mwy o ddŵr na'r cyfartaledd, mae help ychwanegol ar gael.

Darganfyddwch sut i gael help ag ôl-ddyledion dŵr o gronfa ymddiriedolaeth dŵr ar National DebtlineYn agor mewn ffenestr newydd

Os oes gennych fesurydd dŵr a'ch bod ar fudd-daliadau penodol, efallai y byddwch yn gymwys ar gyfer y cynllun WaterSure. Os ydych yn rhan o'r cynllun, mae'ch bil wedi'i gapio ar y bil mesurydd cyfartalog ar gyfer ardal eich cwmni dŵr.

Mae gan Gymru gynllun tebyg o'r enw WaterSure Cymru. 

Os ydych wedi methu mwy nag un taliad neu os ydych yn jyglo dyledion eraill, mae'n bwysig eich bod yn eu talu yn y drefn iawn. Mae hyn oherwydd bod rhai yn fwy brys ac mae gan rai benthycwyr fwy o rym nag eraill.