Pryd i ddefnyddio brocer yswiriant

Mae brocer yswiriant yn gynghorydd ariannol rheoledig sy'n arbenigo mewn yswiriant cyffredinol. Maent yn arbenigwyr a fydd yn eich helpu i benderfynu pa fath o yswiriant a lefel yr yswiriant rydych ei angen ac yn argymell polisi addas am bris y gallwch ei fforddio. Fe'u telir trwy gomisiwn, a gall eu barn broffesiynol fod yn werthfawr os yw'ch anghenion yswiriant yn gymhleth.

Pan ydych yn chwilio am bolisi yswiriant cyffredinol - fel yswiriant teithio, cartref neu gerbyd - gallai eich man galw cyntaf fod yn wefan gymharu.

Er eu bod yn lle da i sganio'r farchnad yn gyflym, nid hwy yw'r ffordd orau bob amser i ddod o hyd i'r polisi yswiriant gorau i chi.

Bydd y polisïau a gynigir i chi ar wefan gymhariaeth yn weddol generig, felly os ydych eisiau yswiriant sy'n diwallu eich anghenion unigol efallai y byddai'n well defnyddio brocer.

Mae sawl rheswm pam gallai mynd at frocer am yswiriant fod y dewis gorau.

Fel gwefannau cymharu, telir comisiwn iddynt gan y darparwr yswiriant am werthu eu cynnyrch. Mae hyn yn golygu nad ydych yn talu ffi iddynt am chwilio am y cynnig gorau i chi.

Yn wahanol i wefannau cymharu mae ganddynt arbenigwyr a gallant roi arweiniad i chi am y cynnyrch mwyaf addas ar eich cyfer.

Nid yw yswirwyr bob amser yn cynnig pob math o yswiriant i chi pan ewch yn uniongyrchol atynt, ac weithiau gall gwefannau cymharu fod yn gyfyngedig yn yr ystod o bolisïau a restrir.

Gall broceriaid siarad â chi trwy'r mathau o orchudd sydd ar gael ar gyfer yr yswirwyr maent yn eu cynnwys a'ch helpu i weithio allan yr hyn sydd ei angen arnoch.

Bydd brocer yn gofyn i chi am eich amgylchiadau personol er mwyn dod o hyd i’r polisi cywir i chi. Gallant hefyd ddweud wrthych a ydych eisoes wedi eich yswirio gan eich polisïau presennol, ac yn aml byddant yn cael y cynnig gorau i chi drwy gymharu prisiau a nodweddion cynnyrch. Gallant hefyd fod yn fwy hyblyg ar bris na’r safleoedd cymharu.

Ar safleoedd cymharu mae’n bosibl y gwelwch na fydd yswiriant ar gyfer rhai pethau sydd angen eu teilwra i gwrdd â’ch anghenion.

Ymhellach ni fydd yswiriant arbennig neu benodol bersonol yno. Felly os ydych eisiau yswirio rhywbeth unigryw fel hynafolyn neu gasgliad gwerthfawr neu ddod o hyd i yswiriant teithio a fydd yn eich diogelu rhag cyflwr sy'n bodoli eisoes, bydd brocer yn gwybod ble i fynd.

Os bydd angen i chi wneud cais, gallai’ch brocer siarad ag aseswyr colledion ac adrannau hawliadau. Byddant yn gwneud cymaint â phosib drosoch fel eich bod yn rhydd o unrhyw drafferthion neu bryderon. Byddant hefyd yn lleihau'r siawns o'ch cais gael ei wrthod.

Mae defnyddio brocer rheoledig yn golygu y gallwch fynd i Wasanaeth yr Ombwdsmon Ariannol os oes gennych gŵyn, a'ch bod wedi'ch amddiffyn gan y Cynllun Iawndal Gwasanaethau Ariannol